သတိပြုရမည့် အမေရိကန်တို့၏ မြန်မာလူထုအပေါ် ထားရှိသည့် သဘောထား

မေလ ၁၃ရက်နေ့ သောကြာနေ့က မြန်မာနိုင်ငံအပေါ်ချမှတ်ထားတဲ့ အရေးယူဒဏ်ခတ်မှုတွေကို သက်တမ်း ထပ်တိုးဖို့အတွက် အမေရိကန်ဥပဒေပြု အမတ်တွေက တောင်းဆိုလိုက်ကြပါတယ်။ လာမယ့် ၂၀ ရက်နေ့ဆိုရင် အမေရိကန်ရဲ့ မြန်မာနိုင်ငံအပေါ် နှစ်ပေါင်းများစွာ ကန့်သတ်ထိန်းချုပ်ထားတဲ့ စီးပွားရေးပိတ်ဆို့မှုက သတ်တမ်း ကုန်တော့မှာ ဖြစ်ပါတယ်။

ယခင်က နိုင်ငံရေးအကျဉ်းသားအကြောင်းပြ၊ စစ်အစိုးရကို အကြောင်းပြကာ အမျိုးမျိုးပိတ်ဆို့ခဲ့တဲ့ အမေရိကန် ဟာ အခုလက်ရှိ ၎င်းတို့အနောက်အုပ်စုလိုလားတဲ့ ဒေါ်အောင်ဆန်းစုကြည်အစိုးရနဲ့ နိုင်ကျဉ်းအားလုံး မရှိချိန် မှာလည်း စီးပွားရေး ဆက်လက်ပိတ်ဆို့ထားပြန်ပါတယ်။ ယင်းလုပ်ရပ်များကြောင့် အမေရိကန်ရဲ့ မြန်မာလူထု အပေါ် ထားရှိတဲ့ သဘောထားမှန်ကို သိသာစေပါတယ်။ 

လက်ရှိမြန်မာနိုင်ငံအနေနဲ့ ဆင်းရဲမွဲတေမှု အမြင့်ဆုံးအဆင့်နိုင်ငံများထဲ ရောက်နေခြင်းမှာအမေရိကန်ရဲ့ အနှစ် ၂၀ ကျော် စီးပွားရေးပိတ်ဆို့မှုနဲ့ သွယ်ဝိုက်ဆက်စပ်နေပြီး ရုပ်သိမ်းသင့်ကြောင်း စီးပွားရေးအကဲခတ်သူများက ဝေဖန်နေကြပါတယ်။ ဒဏ်ခတ်အရေးယူမှုတွေ ဆက်ထားရှိတာဟာ မြန်မာ့ပြုပြင်ပြောင်းလဲရေးအတွက် အကျိုး မရှိတဲ့ အတွက် ဖယ်ရှားဖို့ တောင်းဆိုသင့်တယ်လို့George Town တက္ကသိုလ်ရဲ့ ဂုဏ်ထူးဆောင် ပါမောက္ခ ဒေးဗစ်စတိုင်းဘတ်က သုံးသပ်ပါတယ်။ အမျိုးသားလွှတ်တော် ကိုယ်စားလှယ်ဟောင်း ဦးလှဆွေကလည်း အမေရိကန်အနေနဲ့ မြန်မာအပေါ်မှာ စေတနာမှန်တယ်ဆိုရင် ဒေါ်အောင်ဆန်းစုကြည် ဦးဆောင်တဲ့ အစိုးရသစ် လက်ထက်မှာ စီးပွားရေးပိတ်ဆို့မှုကို အပြီးပိုင် ရုပ်သိမ်းဖို့လိုတယ်လို့ဆိုပါတယ်။ ဒါ့အပြင် ဒေါ်အောင်ဆန်း စုကြည်အနေနဲ့လည်း အာဏာမရခင်က ပြောခဲ့တဲ့စီးပွားရေးပိတ်ထားဖို့နဲ့ ရင်းနှီးမြှုပ်နှံမှုမလာဖို့ ပြောဆိုထားတာ တွေကို ပြန်လည်ရုပ်သိမ်းပြီး စီးပွားရေးပိတ်ဆို့မှုကို ဖွင့်ပေးဖို့ တောင်းဆိုသင့်ကြောင်း ပြောဆိုထားပါတယ်။

ပြီးခဲ့တဲ့ မေလ ၁၀ ရက် အင်္ဂါနေ့ကလည်း အမေရိကန်သံအမတ်ကြီး Scot Marciel မှ မြန်မာဘက်က မခေါ်ဖို့ အကြောင်းကြားထားတဲ့ ရိုဟင်ဂျာ ဆိုတဲ့ အသုံးအနှုန်းကို ဆက်လက်သုံးစွဲသွားမှာ ဖြစ်တယ်လို့ သတင်းစာ ရှင်းလင်းပွဲမှာ ပြောဆိုခဲ့တာကြောင့် မေလ ၁၃ ရက်နေ့ကမန္တလေးမှာ လူထောင်နဲ့ချီပြီး ဆန္ဒပြမှုတွေပေါ်ပေါက် ခဲ့ပါတယ်။ ယခုလဆန်းပိုင်းကလည်း အမေရိကန်သံရုံးရဲ့ ကြေညာချက်မှာ ရိုဟင်ဂျာဟု သုံးနှုန်းထားခြင်း ကြောင့် အမေရိကန်သံရုံးရှေ့မှာ မြန်မာပြည်သူအများအပြား သွားရောက်ဆန္ဒပြခဲ့ကြပါတယ်။ အမေရိကန်သံရုံး နဲ့ အမေရိကန်အစိုးရရဲ့ လုပ်ရပ်များဟာ မြန်မာနိုင်ငံ တိုးတက်ဖွံ့ဖြိုးဖို့ထက် မြန်မာပြည်တွင်း ပဋိပက္ခများဖြစ်ကာ စီးပွားရေး နိမ့်ကျမှုကိုသာ ဦးတည်စေတာကို မြန်မာပြည်သူအပေါင်း သတိထားစောင့်ကြည့်ရမှာဖြစ်ပါတယ်။

ဒေါက်တာ ဥက္ကာဧရာ
By ခေတ်ပြိုင်မီဒီယာ