မဖဲဝါ ရှင်းတမ်း - ၃

ကျနော်က မဖဲဝါစာအုပ်နဲ့ အောင်မြင်ခဲ့တာဆိုတော့ မဖဲဝါနဲ့ ပတ်သက်ရင် ကျနော့်ကိုပဲ မေးလားမြန်းလား လုပ်ကြတယ်။ တဖြည်းဖြည်း ကျနော့်မှာ မဖဲဝါရဲ့ ပြောရေးဆိုခွင့်ရှိသူလိုလို ဘာလိုလိုဖြစ်လို့ .. အဟဲ။ အခု ဒီ စာလေးမှာ မဖဲဝါနဲ့ ပတ်သက်ပြီး အမေးများတဲ့ မေးခွန်းလေးတွေကို စုဖြေပေးသွားပါ့မယ်။

မဖဲဝါအကြောင်း အထုပ္ပတ္တိ အပြည့်အစုံကတော့ နန္ဓာဒေ၀ီဆိုတဲ့ နာမည်နဲ့ ကျနော် စာအုပ်ထုတ်ခဲ့ပြီးပါပြီ။ လူ့ဘ၀က သူ့မူလနာမည်ဟာ နန္ဒာဒေ၀ီဖြစ်ပါတယ်။ နောက်ပိုင်း သူ့ရန်သူတွေက လိုက်လို့ ပြေးရစဉ်မှာ ဖလာဝဟဆိုတဲ့ ပါဠိ အနက်ကို စွဲလို့ မဖဲဝါလို့ အသံဖလှယ်ပြီး နာမည် ယူခဲ့တာ ဖြစ်ပါတယ်။ ဖလာဝဟဆိုတာ ပါဠိစကားပါ။ မြန်မာလို အကျိုးကိုဆောင်သည်လို့ အဓိပ္ပါယ်ရပါတယ်။ ဖလာဝဟ ကနေ ဖဲဝါ ဖြစ်လာတာပေါ့။

သူ့အစ်ကိုကတော့ ဖိုးစံမှဲ့ဆိုတာ သိကြပါလိမ့်မယ်။ သူ့အစ်ကိုရဲ့ လူ့ဘ၀က မူလနာမည်ဟာ မင်းရဲကျော်ခေါင်ပါ။ နောက်ပိုင်းမှ စမ္မဆိုတဲ့ ပါဠိ အဓိပ္ပါယ်နဲ့ သူ့ကိုယ်သူ စံမှဲ့လို့ ပြောင်းလိုက်တာ ဖြစ်ပါတယ်။ စမ္မဆိုတာ မြန်မာလို စစ်တိုက်ရာမှာ သုံးသောည လွှား၊ ကာ စသဖြင့် အဓိပ္ပါယ်ရပါတယ်။ သူ့တစ်ဦးတည်းသော ညီမလေး (နန္ဒာဒေ၀ီတစ်ဖြစ်လဲ မဖဲဝါ) ကို ကာကွယ်စောင့်ရှောက်မယ်ဆိုတဲ့သဘောပေါ့။

ကျနော့်ရဲ့ မဖဲဝါ (၁) စာအုပ်ဖတ်ဘူးသူတွေ မှတ်မိကြမှာပါ။ အဲဒီထဲက အဓိကဇာတ်ကောင်နာမည်က ခင်စက်မေတဲ့။ နောက်ပိုင်းသူ ဆုံးသွားတော့ အုပ်ဂူမှာ ခင်ဖဲဝါအဖြစ် ကမ္ပည်းထိုးခြင်း ခံလိုက်ရရှာတယ်။ ဒီတော့ တစ်ချို့က မေးကြတယ်။

`ခင်စက်မေဆိုတာ မဖဲဝါလား၊ ဒါဆို နန္ဒာဒေ၀ီကရော ... မဖဲဝါနဲ့ ခင်စက်မေ ဘယ်လို ပတ်သက်လဲ´
ဆိုတဲ့အကြောင်းတွေပါ။ နောက်ထပ်မေးခွန်းတစ်ခုလည်း ရှိပါသေးတယ်။`မဖဲဝါဆိုတာ ဘယ်ခေတ်က စပေါ်တာလဲ´ တဲ့။ကျနော့်အဖြေကို မပေးသေးပဲ မေးခွန်း၂ခုကို တစ်ဆက်တည်း ဖော်ပြရတာက အကြောင်းရှိပါတယ်။ အဲဒီ ၂ခုဟာ ဆက်စပ်နေလို့မို့ပါ။
နောက်က မေးခွန်းကို အရင်ဖြေပါ့မယ်။

မဖဲဝါပေါ်ပေါက်ခဲ့တဲ့ ခေတ်ကာလနဲ့ ပတ်သက်လို့ ၀ိဝါဒကွဲစရာ အမျိုးမျိုးရှိနေပါတယ်။ ပါးစပ်ရာဇ၀င်အဆိုအရ ပုဂံအပျက် - ပင်းယခေတ် လောက်ကလို့ ဆိုကြတယ်။ ဒါပေမဲ့ ကျနော် မဖဲဝါစာအုပ်ရေးဖြစ်ခဲ့စေအောင် အဓိက အချက်အလက် စုဆောင်းပေးသူဖြစ်တဲ့ မိတ်ဆွေ သုဘရာဇာကြီးဆီမှာ ရှိတဲ့ ပုရပိုဒ်ဟောင်းကလေးမှာတော့ အင်းဝခေတ်နောက်ပိုင်းကျမှ သုသာန်စောင့်ဆိုတဲ့ နေရာမှာ မဖဲဝါနာမည် ဖော်ပြထားတာ တွေ့ရပါတယ်။(အဲဒီ ပုရပိုဒ်အကြောင်းနဲ့ မိတ်ဆွေသုဘရာဇာကြီးအကြောင်း မဖဲဝါစာအုပ်ကျနော်ရေးဖြစ်စေခဲ့တဲ့ အကြောင်းတွေကို နောက်ပိုင်းမှာ သပ်သပ်ဆက်ပြောပါ့မယ်။ တရှည်တလျားပြောရမှာမို့ပါ)

ပြောရရင်တော့ ဒီလို နတ်စိမ်းတွေရဲ့ အကြောင်းဟာ အထောက်အထား အပြည့်အစုံရှာဖို့ အတော်ခက်ပါတယ်။ ဒါက လူတွေရဲ့ ပါးစပ်ရာဇ၀င်မှာသာ တစ်ဆင့်စကားတစ်ဆင့်နားနဲ ပြန့်ပွားတတ်တာကိုး။ ဘာပဲဖြစ်ဖြစ် မဖဲဝါပေါ်ပေါက်လာခြင်းဟာ အနည်းဆုံး နှစ် ၃၀၀ ကျော်ဝန်းကျင် ရှိပြီလို့ ခန့်မှန်းရပါတယ်။ ရှေ့ပိုင်းမှာ ရေးထားခဲ့တဲ့ မေးခွန်းကို ဆက်ဖြေပါ့မယ်။
`ခင်စက်မေဟာ မဖဲဝါနဲ့ ဘယ်လို ပတ်သက်သလဲ´ ဆိုတဲ့ မေးခွန်းပါ။ လက်ရှိ မဖဲဝါဟာ ခင်စက်မေဖြစ်ပါတယ်။ ခင်ဖဲဝါပေါ့လေ။
ဘာကြောင့်ဆိုတာ ရှင်းပြပါ့မယ်။

ဒီလောက်နှစ်တွေကြာမှတော့လဲ မူလမဖဲဝါ (နန္ဒာဒေ၀ီ) ဟာ လွတ်ကျွတ်ပြီပေါ့။ အင်မတန်အစွမ်းထက်တဲ့ နတ်ဝင်သည်တစ်ယောက်ကို ကျနော်ဆုံခဲ့ဖူးပါတယ်။ မဖဲဝါနဲ့ ဆက်သွယ်နိုင်သူလို့ ဆိုကြပါတယ်။ (တကယ်တော့ နတ်ဝင်သည်ဆိုတာ Medium ပါပဲ။ သူ့အစွမ်းထက်မှုအလိုက် မြင်အပ် မမြင်အပ်တဲ့ လောကအလုံးကို ဆက်သွယ်လို့ ရတယ်လို့ သိရပါတယ်) သူ့ပြောပြချက်အရတော့ မူလ မဖဲဝါဖြစ်တဲ့ နန္ဒာဒေ၀ီဟာ အာကာသစိုး ဆိုလား ဖြစ်သွားပြီဆိုပါတယ်။ ပရလောကမှာလဲ အဆင့်တက်သွားတာမျိုး ရှိသတဲ့။ သူ့ကို ရည်စူးပြီး အလှူဒါနပြုကြတာမျိုး၊ အမျှဝေတာမျိုးဆို သူတို့လည်း Promotion တက်သွားနိုင်တယ်နဲ့ တူပါရဲ့။

ဒါပေမဲ့ မဖဲဝါဆိုတဲ့ နာမည်ခံယူထားသူကတော့ ရှိနေမြဲ ဖြစ်ကြောင်းသိရပါတယ်။ ဒါဟာ ဘွဲ့တစ်ခုလိုဖြစ်နေတယ်။ဒီအတွက် ဥပမာပြစရာလည်း ရှိပါတယ်။ ပုဏ္ဏကတိုက်တယ်တို့ အာဠာဝကစီးတယ်တို့ ခုထက်ထိ ကြားဖူးကြဦးမှာပါ။ ဒါပေမဲ့ မူလ ပုဏ္ဏကတို့ အာဠာဝကတို့တွေကတော့ ဘုရားရှင်တော်လက်ထက်မှာထဲက သံသရာက လွတ်မြောက်ရာလမ်းကို ရှေးရှုကုန်ကြပါပြီ။ အခုဆက်ရှိနေတာတွေက မူလ ဘွဲ့နာမကို ခံယူထားသူတွေသာ ဖြစ်ပါလိမ့်မယ်။မဖဲဝါလည်း ဒီလိုပဲဖြစ်လိမ့်မယ်လို့ ခန့်မှန်းရပါတယ်။ လက်ရှမဖဲ

မဖဲဝါရဲ့ အလုပ်က သုသာန်တွေကို စောင့်ကြပ်တာပါ။ သုသာန်တွေမှာပဲ သူနေတယ်လို့ သိရပါတယ်။ အင်မတန်ဆိုးရွားတဲ့ အခြေအနေမျိုးမှာမှ ရပ်ထဲရွာထဲ သူဝင်သတဲ့။ အဲဒီလို ရွာထဲ ၀င်တဲ့အခါ ညဘက်တွေမှာ သူဝင်လေ့ရှိတယ်လို့ ဆိုပါတယ်။ အဲဒီအခါ ခွေးတွေ အရမ်းဟောင်တယ်။ သံရှည်ကြီးတွေဆွဲပြီး အသည်းယားလောက်အောင် အူကြတယ်လို့ ပြောကြတယ်။

နတ်ပွဲတစ်ခုမှာ မဖဲဝါ ၀င်လာတာကိုတော့ ကျနော်ကိုယ်တွေ့ကြုံဘူးပါတယ်။ ဒီ့နောက်ဆက်တင်မယ့် ကျနော်နှင့် မဖဲဝါ - ၃ မှာ အဲဒီအကြောင်း ရေးထားပါတယ်။

ညဘက် မဖဲဝါ၀င်လို့မို့ ခွေးတွေအူတဲ့အခါ အဲဒီခွေးကို မအော်ရဘူး၊ မငေါက်ရဘူးလို့ အဆိုရှိပါတယ်။ ဒါကလည်း တောတွေဘာတွေ ၀င်ရင် နာမည် မခေါ်ရဘူးဆိုတဲ့ အယူမျိုးနဲ့ ဆင်နေတာ တွေ့ရပါတယ်။ တောဝင်တဲ့အခါ အချင်းချင်းနာမည်ခေါ်လို့ ကိုယ့်နာမည် သိသွားရင် နာနာဘ၀တွေက လိုက်ခေါ်တတ်သတဲ့။ အဲဒီအခါ ကိုယ်က ထူးမိရင် ကိုယ်နဲ့သူ နေရာလဲခံရတယ်လို့ ဆိုပါတယ်။ ဒါကြောင့် တောထဲမှာဆို နာမည်ခေါ်ရင် အေးတို့ ဟုတ်ကဲ့တို့ မထူးပဲ `၀ူး´ လို့ ထူးကြတယ်လို့လဲ ကြားဖူးပါတယ်။ အခု မဖဲဝါနဲ့ပတ်သက်ရင်လဲ ညဘက်အိမ်ရှေ့ ခွေးတွေ ဟောင်တဲ့အခါ ငေါက်မိရင် သူ့စက်ကွင်းအောက်ရောက်သွားတယ် ထင်ပါရဲ့။ နံနက်ပိုင်းမှာ အခေါင်းကြီးတစ်လုံး အိမ်ရှေ့လာချထားတာ တွေ့ရတယ်လို့ အဆိုရှိပါတယ်။(မပြီးသေးပါ ... အပြင်ခဏထွက်သွားလို့ ညမှ ဆက်ရေးပါ့မယ်။)

[ ဒဿကျော်စွာ ]


Credit- https://www.facebook.com/deaththekyawswar

 

မောင်(စွယ်စုံကျမ်း)