ဦးပြားအတွက် ရည်စူးပြီး ထူးဖောင်းဒေးရှင်းမှ နယ်လှည့်ဆေးကုသရေးအဖွဲ့ တောင်ကြီးမြို့နယ်၊ ပန်းကွေးရွာတွင် ဆေးကုသမှုများ အခမဲ့ ပြုလုပ်ပေးလျှက်ရှိ

မေတ္တာ၊ စေတနာကို အရင်းတည်ပြီး သွားနှင့်ခံတွင်း ဝေဒနာရှင်များအား မြန်မာပြည်အနှံ့ အခမဲ့လိုက်လံ ဆေးကုပေးလျှက်ရှိသော ထူးဖောင်ဒေးရှင်းနှင့် မြန်မာနိုင်ငံ သွားနှင့်ခံတွင်း ဆေးကောင်စီမှ ဆရာဝန်ကြီးများ ပါဝင်သော နယ်လှည့်ဆေးကုသရေး အဖွဲ့သည် မေလ(၂၁)ရက်နေ့က တောင်ကြီးမြို့နယ်၊ ပန်းကွေးကျေးရွာ နှင့် အနီးပတ်ဝန်းကျင်မှ သွားနှင့်ခံတွင်း ဝေဒနာရှင်များအား ဆေးကုသမှုများ ပြုလုပ်ပေးလျှက် ရှိပါသည်။

ထူးဖောင်ဒေးရှင်း နယ်လှည့်ဆေးကုသရေး အဖွဲ့သည် ပန်းကွေးကျေးရွာ ဘုန်းတော်ကြီးကျောင်းတွင် မေလ (၂၁)ရက်နေ့မှ (၂၃)ရက်နေ့အထိ (၃)ရက်တိုင်တိုင် သွားနှင့် ခံတွင်း လူနာများအား အခမဲ့ ကုသပေးမည်ဖြစ်ပါသည်။ ယမန်နေ့ မေလ (၂၁)ရက်နေ့က သွားနှင့်ခံတွင်း လူနာ(၁၃၉)ဦးအား ဆေးကုသ ပေးခဲ့ပြီး လူနာ (၁၈)ဦးအား အံကပ်များ ပြုလုပ်ပေးခဲ့ပါသည်။
ယခုနယ်လှည့်ဆေးကုသရေးအစီအစဉ်ကို ထူးဖောင်ဒေးရှင်း၏ နာယကဦးတေဇ၏ လမ်းညွှန်မှုဖြင့် ဟဲဟိုးတွင် လေယာဉ်မတော်တဆမှုကြောင့် ကွယ်လွန်ခဲ့သည့် ဦးပြားအတွက် ရည်စူးပြီး ဦးပြား၏ ရွာတွင် ထူးဖောင်ဒေးရှင်းနှင့် မြန်မာနိုင်ငံ သွားနှင့် ခံတွင်း ဆေးကောင်စီမှ ဆရာဝန်ကြီးများက မေတ္တာဖြင့် အခမဲ့ ဆေးကုသပေးသည့် အစီအစဉ်ဖြစ်ပါသည်။
ထူးဖောင်ဒေးရှင်းသည် မြန်မာနိုင်ငံ ဂုဏ်တက်စေမည့် ဧ၀ရတ်တောင်တက် အောင်နိုင်ရေး ခရီးစဉ်အား ငွေအား၊ လူအားဖြင့် ကူညီပံ့ပိုးပေးနေသလို အခြားတစ်ဖက်ကလည်း အမှန်တကယ် လိုအပ်လျှက်ရှိသော ဒေသများတွင် ပညာရေး၊ လူမှုရေး၊ ကျန်းမာရေးနှင့် ဒေသဖွံ့ဖြိုးရေးများကို အစွမ်းကုန် ဆောင်ရွက်လျက်ရှိပါသည်။

Htoo Foundation added 30 new photos.